حملة لمصلحة فرقتي حلو لينا الحارثي تزيد الضغط على مسؤولي مراكش.. لكن أجي نكول ليك علاش الكوكاب ماخلاوهاش في الحارثي تلعب الماتش

محمد بولطار

أجي نكول ليك علاش، الكوكاب في الحارثي ماخلاوهاش تلعب الماتش، علاحقاش كالو بلي القضية فيها مشكل أمني، كيهدد مالين الأوطيلات والبوتيكات والقهاوي اللي خدامة جور إنوي، ومابغاتش الجمهور في الويكاند يجي يخسر ليها لورير كونتيني..

أجي نكول ليك علاش، الكوكاب في الحارثي ماخلاوهاش تلعب الماتش، علاحقاش في جليز المترو تالعقار ساوي الملاير، والكرة عندنا غي لعبة ماتزيد ماتنقص ما تدخل فلس، ومالين القرار، عليهوم طال الانتظار، باش يبيعو الحارثي هكتار بهكتار، ويتهناو من صداع الراس والكرة والتهراس..

أجي نكول ليك علاش، الكوكاب في الحارثي ماخلاوهاش تلعب الماتش، علاحقاش الوالي كاليك أسيدي حركة السير والجولان وقطيع الطريق وإلحاق الأضرار بالإستثمار..، واخة نفترضو كلامك على صواب، واخة كاع الملاعب فوسط المدن جات، وكل سيمانة ليها الجماهير حاجة، وراه الدار البيضاء ووجدة وتطوان وآسفي والجديدة كلها على كلامي شاهدة، فين كانو مالين العقد والحل فاش التراخيص كتسينا لمالين الاوطيلات والقهاوي والبوتيكات، وما فكرتو في الطروطوار والشانطي تزيدو فيه بعض الخطاوي، وتيسرو الأمور وتخططو للمستقبل بكل تفاءل..

أجي نكول ليك علاش، الكوكاب في الحارثي ماخلاوهاش تلعب الماتش، علاحقاش مسكينة ماكانش عندها اللي يهضر عليها، ومسؤولين صحاح يدافعو عليها، هادوك اللي كانو  ماقادين على صداع، ومن السلطة واخدين شبر تالتيساع، بغاو غي الكرسي والتبنديق وداكشي، والكويكة فين ما لعبات راها قاضية الغرض، دابا الكوكاب عندها مكتب محترم وعلى الظلم مايقدر يسكت وينام، وغادي ينوض يجري ويجاري بالنهار واليالي، باش الحارثي يتحل والجمهور يفرح والكويكة ترتاح وتعود الأفراح.

الكويكة اليوم كتعاني، وجمهورها ليكوم يقول راه مامفاكينش، وعلى حقنا ماساكتينش، حتى ترجع فرقتا فالحارثي تلعب الماتش وفي التربين نهزو الباش ونشجعو بطريقة حضارية وبلا تهراس وماباقي حد يكول لينا حكا هاعلاش الفرقة ماربحاتش..